Goierriko Hitza

«Gertatutakoa konfiantza arazoa izan dela esango digute, pertsona batengan konfiantza handiegia izan dutela, eta horrek huts egin duela. Baina konfiantza arazoaz haratago, arazo honen muinean Udalaren utzikeria dago». Majori kiroldegiaren kudeaketaren inguruan sortu den auziari buruz Ordiziako ezker abertzaleak egin duen irakurketaren mezu nagusia da hori. Prentsa-ohar bidez plazaratu dute haien iritzia.

Ezker abertzaleak dio ez dutela surik egin nahi eroritako arbolarekin, haien ustez, «kontua» ez delako hor bukatzen. «Majoriko gerenteak onartu du egindako lapurreta. Lanpostua galduko du, eta salaketari egin beharko dio aurre». Ezker abertzalearen iritziz, kudeatzailearen «egoera pertsonala tamalgarria» izateak, ez du galarazi behar gertatutakoa «serio aztertzea» eta «behar diren neurriak hartzea» exijitzea.

«AZALPEN PUBLIKO GARBIAK»
Majori kiroldegian gertatutakoa «erakunde publiko batean egindako lapurreta» dela adierazi du ezker abertzaleak, eta hori dela eta, «informazio osoa» emateko exijitu diote Udalari. «Diru publikoaz ari gara. Beraz, ordiziarroi azalpen publiko garbiak eman behar zaizkigu. Nola eta noiztik izan da posible hau gertatzea? Nola administratzen eta kontrolatzen dira diru sarrera eta gastuak?».

Azalpenak eskatzeaz gain, udalkideei «ardura politikoak argitzeko» eskaera egin diete. Majori kiroldegiko zuzendari-kudeatzailea zenak salaketari aurre egin beharko diola adierazi du ezker abertzaleak, baina «alkateak eta zinegotziek» duten arduraz galdera egin dute. «Nork eraman behar zuen gestioaren kontrola? Zein arduradun tekniko eta politikok huts egin du bere eginkizunean?».

«KONTROL ETA IRIZPIDERIK EZ»
Oharrak dioenez, Majoriren zerbitzuan eta kudeaketan «hainbat arazo» izan dira azken urteetan. Zerbitzu eta kalitatean «galera» egon dela, monitoreek «alde egin» dutela, «berrikuntzarik ez» dela izan, gerenteak «eskumen gehiegi» zituela, «kontrol eta irizpide politikorik ez» dela egon, «arduradun politiko aldetik utzikeria» egon dela, «arazoak» izan direla «gerentziaren eta zerbitzuen ardura zuen enpresaren artean», eta kontzesioa zuen enpresarekiko eta langileekiko «presioak» izan direla dio ezker abertzaleak.

«BAKARRIK GERATU GINEN»
«Antzemandako arazo horiei konponbidea emateko», orain hiru urte ezker abertzaleak eta orduan zerbitzua ematen zuen enpresak «zerbitzua hobetzeko, elkarlana bultzatzeko eta politikoen inplikazioa areagotzeko hainbat proposamen» egin zituztela dio oharrak. «Ez arduradun politikoek, ez Udaleko teknikariek ez zuten inolako neurririk hartzea babestu. Bakarrik geratu ginen».

Gertatutakoarekin harritu ez direnik ezin dutela esan dio ezker abertzaleak, baina EAJren, PSE-EEren eta EAren «udal gestioaren ereduak halako gauzak gertatzea posible egiten» du. Haien esanetan, EAJ «espezialista» da erakunde publikoak gestionatzeko Fundazio eta Elkarte anonimoak sortzen. Guggenheim aipatu dute, baina Ordizian ere halakorik badagoela diote: «Ordizia Lantzen, Majori Patronatua elkarte mugatu bihurtua, Oiangu parkearen esplotazioa enpresa pribatu bati eman diote...».