Goierriko Hitza

Datorren astean beste azoka baten bilgune izango da Ordiziako Plaza Nagusia: Gizarte Boluntarioen Feria. Herritarren Partehartzea eta Boluntariotzaren Sustapenerako udal batzordeak antolatu du azoka berri hori, feria eta jaialdietako delegazioaren eta hainbat elkarteren laguntzarekin. Ekainaren 14an izango da azoka, eta datorren aste guztirako hitzaldi-ziklo bat antolatu dute.

Monica Marañon Herritarren Partehartzerako batzordeburuaren arabera, Ordizian lan egiten duten gizarte boluntario eta elkarteen lana jendeari ezagutzera ematea da aurreneko helburua, «sarritan esker gutxi jasotzen duen lana baita». Bigarren helburu bat ere nabarmendu du gaurko agerraldian: «Boluntarioen arteko topagune, esperientziak elkar trukatzeko gune, boluntarioen ekimenak zabaldu eta berri emateko eremu, eta boluntario berriak hartzeko aukera gisa antolatu nahi dugu azoka hori».

"BALORE FALTA HANDIA"
Marañonen ustez, gaur egungo gizartea «gero eta indibidualistagoa eta balore falta handiagokoa bihutzen ari» da, baina salbuespenak ere badaudela nabarmendu du. «Horren adierazpena da Ordizian lan egiten duten boluntarioak, hain aktibo eta beharrezkoa den mugimendua, baina sarritan horren gutxi eskertzen dena».

Jose Migel Santamaria alkatearen esanetan, legealdi hasieran sortutako delegazio berria ez zen «kapritxoz» sortu, «asko baitira Ordizian betidanik musutruk, ia egunero, gure gizartearen eta denon bizi-kalitatea hobetzearen alde lan egiten duten boluntarioak». Babes zibileko langileek joan den igandean izandako euriteen ondoren egin zuten lana jarri du adibide modura Santamariak.

LIBANORI BURUZKO ERAKUSKETA
Ekainaren 14a izango da azokaren eguna, baina astelehenetik ostiralera boluntario elkarteek emandako hitzaldiak izango dira Barrenan, 19:00etan. Horrez gain, Gurutze Gorriak Libanoko gerrari buruz prestatutako ’33 gerra egun 33 iruditan’ erakusketa egongo da ikusgai Delikatuzen aste osoan.