Goierriko Hitza

30 urteren ondoren, hirugarren mailan jokatuko du berriz ere Ordiziak. Azken minutuan lortutako gol batek eman die garaipena ordiziarrei. Guztira, 21 garaipen eta 70 puntu lortu dituzte urdinek, eta honenbestez, preferente mailako titulua eta hirugarren mailarako igoera lortu dituzte. Eromenak hartu du Altamira zelaia, eta jokalari, tekniko eta zaletuak, denak atera dira berdegunera garaipen historikoa ospatzera.

Azken minutuan. Hala lortu zituen Ordiziak gola, garaipena eta hirugarren mailarako igoera. Eta Cresporen golarekin batera lehertu zen festa Ordiziako Altamira zelaian. Euripean, jokalari, tekniko eta zaletuak, denak berdegunera atera ziren garaipena ospatzera. Urdinek, taldearen historian ondo gordeta geldituko den titulua lortu zuten atzo. Hogeita hamar urte eta gero, Ordiziak hirugarren mailan jokatuko du berriro ere.
Azken minutura arte ez zen erabaki Zumaiakoren aurkako partida. Ordiziarrak gehiago izan ziren partidan zehar, eta areara ere behin baina gehiagotan iritsi ziren, baina ez zuten asmatu izandako gol aukerak aprobetxatzen. Bigarren zatiko 46. minutuan, partida hutsean amaituko zela zirudienean ordea, Crespok garaipenaren gola egin zuen ordiziarrentzat. Epaileak minutu bat besterik ez zuen luzatu partida, baina minutu luzea izan zen Altamiran bildutako zaleentzat. Izan ere, falta jaurtiketa batean, azken aukera bat izan zuen Zumaiakok, baina baloia kanpora joan zen azkenean.
Epaileak azken txistua jo orduko, benetako festa bihurtu zen Altamirako zelaia. Partida guztian jokalariak animatzen egon zen publikoa, eta azkenean, eurek ere merezitako saria jaso zuten. Euria eta txaloak, dena batera etorri zen. Futbolari, entrenatzaile eta Ordizia Kirol Elkarteko gainontzeko tekniko guztiak zelaiaren erdialdera atera ziren. Baita partida ikusten ari ziren gaztetxo eta zaletuak ere. Jokalarien arteko besarkadak, entrenatzailea airetan botatzea, taldeko argazkiak, dena izan zen festa eta ospakizuna, dena izan zen eromena ordiziarrentzat.
Iluntzean, herrian bertan jarraitu zuten ospakizunek. Datozen egunetan ere, ligako titulua eta hirugarren mailarako igoera ospatzeko ekitaldi gehiago izango dira.