Goierriko Hitza

Ordiziako Udalak Ikena eta Ikengu enpresekin elkarlanean edota etorkizunean izan daitekeen beste entitate baten laguntzarekin eraiki ditzakeen instalazioei «boikot aktiboa» egiteko deia egin die herritarrei Oiangu Parkea Bizirik Natur Elkarteak. «Oianguko proiektuak parkearen pribatizazioa, ingurunearen hondatzea nahiz egundaino arnas zitekeen giro askea galtzea eragiten du», azaldu zuten atzo Oiangu Bizirikeko kideek Oiangurengo parkean bertan egin zuten agerraldian.

Oianguko golf-zelaiaren proiektuaren «bazkide ez egiteko», eta praktiketako kantxan «ez jokatzeko» deia egin diete herritarrei. «Sor daitezkeen ostatu nahiz taberna zerbitzuetan ere ez ezazuela kontsumitu eta proiektua ez ezazuela lagundu eskatzen dizuegu, arren».

Boikota eginez gero, Oianguren parkearen «pribatizazioa nahiz bere paisaia eta ingurunearen narridura geldituko» dutela adierazi dute Oiangu Bizirik elkarteko kideek, eta parkearen hainbat gunetan «pestizidak erabiltzea eta Oianguko parkearen erabiltzaileengan lesioak eta kalteak eragitea saihestuko» dutela.

HERRI GALDEKETA DEITU ARTE
Oiangu parkea «guztiona eta guztion gozamenerako» dela nabarmendu dute, eta Ordiziako Udalak herri galdeketa deitu bitartean boikotaren jarrerari eusteko eskatu diete herritarrei. Oiangu Bizirik elkarteak gogoratu du Oiangu «parke publikoa» dela, eta «balio paisajistiko handiko jolastoki eta atsedenleku osasungarria» dela. Inguruak natur balio «ugari» dituela diote. «Ordiziako Udala, ordiziarroi nahiz parkeko erabiltzaileei galdetu gabe, parkearen gune libreak pribatizatu eta itxuraldatzeko ahaleginetan dabil».

Golf-praktikarako zelaia, igerilekua eta aparkalekua egin nahi dituztela, eta aterpetxea hiru izarreko hotelean bihurtu nahi dutela esan ondoren, asmo horiek «parkeko hainbat gunetarako sarbidea» mugatzen dutela jakinarazi dute. Halaber, gogorarazi dute aparkalekuaren eta jatetxe-hotelaren aurka helegiteak aurkeztu dituztela.