Banan-banan aipatzen hastekotan lerro asko beharko lirateke, postuz postu lore aukera handia baitago. Zaldibiako Azanza loretegiko Iñakik edergarri gisa erabili ohi ditugunaz gain, belar jangarrietan edo espezietan zer erakutsia badu. Erromeroa, xarpota (tomilloa), oreganoa, menta, kanonigoak, rukulak… Denak ekologikoak eta 2,5 euroan salgai bakoitza: «Landarea bera ez da azken urteetan garestitu, baina garraioa asko», nabarmendu du Azanzak.
Izan ere, Alemania, Herbereak, Belgika, Danimarka… Europako hainbat herrialdetatik ekarri ohi dituzte espeziak. Bestalde, galtzen ez diren loreen aldeko apustua egingo omen du: «Aurrerantzean bakoitzak bere garaia du eta ondo antolatuz, loraldia urtera luzatu daiteke». Aukeran dira Sedum sevangulare, Arabis Blepharophylla, Armerra splendens, latineko deituran hain arrotzak egiten diren arren, asko oso ezagunak direnak.
Arrautzak, berriz, garestitzen ari dira. Egia esan, aldaketa ez da handia, baina Patxi Atienzak aurreratua beste batzuk ere azpimarratu digute: «Berezoak arrautzen prezioari beste edozeini baino gehiago begiratzen dio, nahikoa da zentimo gutxi garestitzea, aitzakia ugari entzuteko», zioen Rakel Artola lazkaotarrak. Bataz beste 10 bat zentimo garestitu da arrautza dozena.
Orain hasi dira ferietan prezio berriarekin, gainerako salmenta tokitan urtarrilaz geroztik. Irudiz Europako legearen aginduz kaiola handiagotan oilo gutxiago sartzera beharturik daude arrautza ekoizleak; kalitatearen aldeko apustu horrek toki berean ekoizpena murriztea dakar, eta ondorioz produktuaren garestitzea.
Udaberriko zizak azokan
Esan eta izan. Joan den asteko esperantzak egia bihurtu dira eta gutxi badira ere, atzo berrehun bat gramo ziza salgai ziren ferian, Pottokako sukalderako bidea laster hartu zutenak. «Belar azpian egonda ere izotzak harrapatu ditu hauek ere», zioen Patxi Aierbe biltzaileak.
Baratzeak oraindik geldirik daude, izotz eta elurrak eragindako kalteak agerian. Ilarrak eta babak, bereziki, ederki sufritu dute azken asteetan, eta asko galdu egin dira hotzak jota.
Susak argitaratu du idazlearen lehen nobela 
Goierriko Hitza
Ordiziako Hitza
Arkaitz Apalategi
Iñaki Gurrutxaga
